Welcome to the website


ЛАТИН БҮЖГИЙН ДЭЛХИЙН АВАРГА ШАЛГАРУУЛАХ ТЭМЦЭЭНД МОНГОЛЫН БАГ, ТАМИРЧИД АМЖИЛТТАЙ ОРОЛЦЛОО

Вена хотноо Латин формейшн болон Шоу данс бүжгийн дэлхийн аварга шалгаруулах тэмцээн 2017 оны 12 дугаар сарын 9-ны өдөр амжилттай болж өндөрлөв.

Энэхүү тэмцээний латин формейшн төрөлд Монгол Улсыг төлөөлөн оролцсон “Moon Dance” болон “Star” бүжгийн хамтлаг хагас шигшээд үлдсэн. Харин “Moon Dance” бүжгийн хамтлаг “Мөсөн хатан” хэмээх бүжгээрээ финалд шалгарч, ОХУ, ХБНГУ, Австрийн шигшээ багтай өрсөлдөв. Шигшээ шалгаруулалтаар 6 дугаар байр эзлэв.
more

ВЕНА ХОТНОО МОНГОЛ УРАН БҮТЭЭЛЧДИЙН “ХӨХ” ХАМТАРСАН ҮЗЭСГЭЛЭН НЭЭЛТЭЭ ХИЙЛЛЭЭ

Австри Улсад оршин суугаа монгол уран бүтээлчдийн “Хөх” уран бүтээлийн хамтарсан үзэсгэлэн 2017 оны 12 дугаар сарын 09-ний өдөр Вена хотын “НУУ” урлагийн галерейд нээлтээ хийлээ. Тус үзэсгэлэнг нээж Элчин сайд Г.Баттунгалаг үг хэлэв.

Энэхүү үзэсгэлэнд уран бүтээлч Г.Лхагвасүрэн, Д.Түвдэндорж, Н.Хосбаяр, Б.Отгонбат, С.Энхтүмэн, Б.Очирсүрэн, Н.Зулцэцэг, Т.Зулаа нарын орчин үеийн уран зураг, монгол зураг, уран баримал, арьсан болон гар урлалын нийт 100 гаруй бүтээлээ дэлгэв.

Тус үзэсгэлэнгийн хүрээнд 2017 оны 12 дугаар сарын 15 -ны өдөр монголын урлаг, соёл, угсаатан зүйн чиглэлээр монгол эрдэмтэд өөрсдийн судалгааны бүтээлийг танилцуулах арга хэмжээ мөн зохион байгуулах юм. Тухайлбал: уран бүтээлч М.Чинбат “Монголын урлаг өнөө үед”, Австрийн Шинжлэх ухааны академийн судлаач эрдэмтэн Б.Цэцэнцолмон “Соёлоо худалдсан урвагчид”, Лондонгийн Их сургуулийн судлаач Пр. Д.Бум-Очир “A question about “Mongol” national identity” сэдвээр илтгэл хэлэлцүүлнэ.
more

ГАДААД ХАРИЛЦААНЫ САЙД Д.ЦОГТБААТАР ЮНИДО-ГИЙН ЕРӨНХИЙ ЗАХИРАЛТАЙ УУЛЗАВ

ЕАБХАБ-ын Сайд нарын зөвлөлийн 24 дүгээр уулзалтад оролцож буй Гадаад харилцааны сайд Д.Цогтбаатар 2017 оны 12 сарын сарын 8-ны өдөр Вена дахь НҮБ-ын байранд зочилж, НҮБ-ын Үйлдвэр хөгжлийн байгууллагын /ЮНИДО/ Ерөнхий захирал Ли Ёнгтой уулзалт хийв. Гадаад харилцааны сайд Д.Цогтбаатар Монгол Улсын Засгийн газар жижиг, дунд үйлдвэрлэлийг хөгжүүлэх, технологийн дэвшил, инновацийг нэвтрүүлэхэд өндөр ач холбогдол өгч байгааг уулзалтын үеэр тэмдэглэв.

ЮНИДО-гийн Ерөнхий захирал Ли Ёнг Монгол Улсын аж үйлдвэрийн хөгжлийг бүрэн дэмжиж ажиллахаа илэрхийлж, эдийн засгийг төрөлжүүлэх, жижиг, дунд үйлдвэрлэлийг дэмжих, технологи дамжуулах чиглэлд хамтын ажиллагаа өргөжүүлэхээ нотлов. Хоёр талын хамтын ажиллагааг гүнзгийрүүлэх хүрээнд ЮНИДО-гийн Ерөнхий захирал Ли Ёнг манай улсад ойрын хугацаанд айлчлахаар болов.
more

ГАДААД ХАРИЛЦААНЫ САЙД Д.ЦОГТБААТАР ЕАБХАБ-ЫН ЕРӨНХИЙ НАРИЙН БИЧГИЙН ДАРГАТАЙ УУЛЗАВ

ЕАБХАБ-ын Сайд нарын зөвлөлийн 24 дүгээр уулзалтад оролцож буй Гадаад харилцааны сайд Д.Цогтбаатар 12 дугаар сарын 8-ны өдөр ЕАБХАБ-ын Ерөнхий нарийн бичгийн дарга (ЕНБД) Т.Гремингертэй уулзаж, хоёр талын хамтын ажиллагааны асуудлаар харилцан ярилцав.

Сайд Д.Цогтбаатар ЕНБД Т.Гремингерт уг албан тушаалд томилогдсонд нь баяр хүргэж, олон улсад энх тайван, аюулгүй байдлыг хангах, итгэлцлийг бэхжүүлэх, хүний эрхийг хамгаалахад ЕАБХАБ-ыг чухал үүрэгтэй байгууллага гэж үздэгийн хувьд Монгол Улс хоёр талын харилцаа, хамтын ажиллагаандаа ихээхэн ач холбогдол өгдөгийг нотолж, хамтын ажиллагаагаа цаашид өргөжүүлэн гүнзгийрүүлэх сонирхолтой байгаагаа илэрхийлэв.

Тэрээр хэд хэдэн салбар, түүний дотор хүн худалдаалах гэмт хэрэг, терроризмээс урьдчилан сэргийлэх, тэмцэх чиглэлээр тодорхой төсөл хөтөлбөр хэрэгжүүлэх, мөн монгол залуусыг ЕАБХАБ-ын Нарийн бичгийн даргын газар хийгээд харьяа байгууллагуудад дадлагажуулах санал тавив.
more

ГАДААД ХАРИЛЦААНЫ САЙД Д.ЦОГТБААТАР АВСТРИЙН ГАДААД ХЭРГИЙН ДЭД САЙДТАЙ УУЛЗАВ

ЕАБХАБ-ын Сайд нарын зөвлөлийн 24 дүгээр уулзалтад оролцож буй Гадаад харилцааны сайд Д.Цогтбаатар 12 дугаар сарын 7-ны өдөр Бүгд Найрамдах Австри Улсын Гадаад хэргийн дэд сайд М.Линхарттай уулзаж, хоёр талын харилцаа, хамтын ажиллагааны асуудлаар ярилцав.

Талууд Монгол, Австрийн харилцаа тогтвортой өргөжин хөгжиж буйг тэмдэглээд хоёр улсын жижиг, дунд үйлдвэрлэгчдийн хамтын ажиллагааг дэмжих, боловсролын салбарт хамтын ажиллагааг өргөжүүлэх, визийн үйлчилгээний нөхцөлийг сайжруулах талаар санал солилцов.
more

ГАДААД ХАРИЛЦААНЫ САЙД Д.ЦОГТБААТАР ЕАБХАБ-ЫН САЙД НАРЫН ЗӨВЛӨЛИЙН УУЛЗАЛТЫН ҮЕЭР ХОЁР ТАЛЫН УУЛЗАЛТУУД ХИЙВ.

Европын аюулгүй байдал, хамтын ажиллагааны байгууллага (ЕАБХАБ)-ын Сайд нарын зөвлөлийн 24 дүгээр уулзалт Бүгд Найрамдах Австри Улсын нийслэл Вена хотноо 2017 оны 12 дугаар сарын 7-8-ны өдрүүдэд болж байна.

Тэрээр Сайд нарын уулзалтад хандаж манай улсын байр суурийг илэрхийлж хэлсэн үгэндээ Европын Холбооны зүгээс Монгол Улсыг татварын ил тод бус тогтолцоотой улс орнуудын “хар жагсаалт”-ад багтаасан нь үндэслэл султай алхам болсонд харамсаж байгаагаа илэрхийлсэн. Мөн Европын Холбооны гишүүн орнуудын төлөөлөгчдийн тэргүүн тухайлбал, Унгарын Гадаад хэргийн сайд, Австри, Румыны Гадаад хэргийн дэд сайд, Португалын ГХЯ-ны Төрийн нарийн бичгийн дарга, Дани, Европын Холбооны төлөөлөлтэй тус тус уулзалт хийж, ЕХ-ны дээрх шийдвэрийг буруушааж, асуудлыг нягтлан үзэх, түүнийг өөрчлөх арга замын талаар ярилцав.
more

ГАДААД ХАРИЛЦААНЫ САЙД Д.ЦОГТБААТАР ЕАБХАБ-ЫН САЙД НАРЫН ЗӨВЛӨЛИЙН УУЛЗАЛТАД ОРОЛЦОЖ БАЙНА

Гадаад харилцааны сайд Д.Цогтбаатар Бүгд Найрамдах Австри Улсын нийслэл Вена хотноо 2017 оны 12 дугаар сарын 7-8-ны өдрүүдэд болж буй Европын аюулгүй байдал, хамтын ажиллагааны байгууллага (ЕАБХАБ)-ын Сайд нарын зөвлөлийн 24 дүгээр уулзалтад оролцож байна.

Энэ удаагийн уулзалтаар ЕАБХАБ-ын оролцогч 57 улс, хамтын ажиллагааны түнш 11 орны Гадаад хэргийн сайд нар тус байгууллагын 2017 оны үйл ажиллагааг дүгнэж, олон улс, бүс нутагт тулгамдсан улс төр, аюулгүй байдлын асуудлыг хэлэлцэн зөвлөлдөж байна.

Гадаад харилцааны сайд Д.Цогтбаатар 2017 оны 12 дугаар сарын 7-ны өдрийн бүгд хуралдаанд үг хэлж, олон улсын маргаантай, хурцадмал асуудлаарх өөрийн улсын байр суурийг илэрхийлж, ЕАБХАБ-ын хүрээнд эдийн засаг, тогтвортой хөгжил, терроризмын эсрэг тэмцэх хамтын ажиллагааг чухалчилж буйг тэмдэглэв. Терроризм, хүчирхийлэлд турхирсан хэт туйлшрах үзлээс урьдчилан сэргийлэхэд хамтын хүчээ нэгтгэж, итгэлцлийг бэхжүүлэх нь чухал хэмээн үзэж байгаагаа Гадаад харилцааны сайд илэрхийлэв. Түүнчлэн Европын Холбооны зүгээс Монгол Улсыг татварын ил тод бус тогтолцоотой улс орнуудын “хар жагсаалт”-ад багтаасан нь үндэслэл султай, харамсалтай алхам болж байгааг тэмдэглэв.
more