БҮГД НАЙРАМДАХ СЛОВЕНИ УЛСЫН ЛЮБЛЯНА ХОТНОО ЗОХИОН БАЙГУУЛАГДСАН МЭТГЭЛЦЭЭНИЙ “WORLD SCHOLAR’S CUP” ТЭМЦЭЭНД МОНГОЛЫН СУРАГЧИД АМЖИЛТТАЙ ОРОЛЦЛОО

Дунд сургуулийн сурагчдын дунд англи хэл дээр зохион байгуулагддаг мэтгэлцээний олон улсын “World Scholar’s Cup” тэмцээнд Монгол Улсаа төлөөлж оролцсон “Хобби” сургуулийн 8С ангийн сурагч Т.Мишээл, Б.Намулун, Б.Аюурбат нарын гишүүдтэй баг амжилттай оролцож нийт 37 медаль (21 алт, 16 мөнгөн медаль) хүртлээ. Тус тэмцээн нь Словени Улсын нийслэл Любляна хотноо зохион байгуулагдсан бөгөөд дэлхийн өнцөг булан бүрээс хүрэлцэн ирсэн 134 баг өрсөлдсөнөөс Монголын баг чансаагаараа 6 дугаар байранд орж, гурван цом хүртэн анх удаагаа ийнхүү өндөр амжилтийг үзүүлсэн тохиолдол байв.

Энэхүү тэмцээн нь дунд сургуулийн сурагчдын дунд мэтгэлцээн, сорил, асуулт хариулт, бүтээлч эссэ бичлэг гэсэн төрлөөр англи хэлээр явагддаг бөгөөд “Хобби” сургуулийн баг энэ онд Улаанбаатар хотноо зохион байгуулагдсан “World Scholar’s Cup” бүсийн тэмцээнд тэргүүн байранд шалгарснаар ийнхүү Любляна хотноо өрсөлдөх эрхээ авсан байна.

Эхний 5 байруудад Америкийн Нэгдсэн Улс, Израил Улс, Бүгд Найрамдах Болгар Улсын баг шалгарав. Түүнчлэн багаараа ажиллах чадвар болон багаараа сорилтыг давах чадвараар монголын баг тус тус 5 дугаар байрыг эзэлж, дараагийн шат буюу АНУ-ын Йелийн их сургуульд зохион байгуулагдах “Tournament of the Champions” тэмцээнд оролцох эрхээ авсан юм.

Монголын багийг энэ удаагийн олон улсын тэмцээн болон Монгол Улсаа сурталчлах “Cultural fair” соёлын арга хэмжээнд Вена дахь ЭСЯ, Могулложистик компани дэмжлэг үзүүлж оролцов.

Монгол Улсаа төлөөлж оролцсон “Хобби” сургуулийн сурагчдад сурлага, цаашдын тэмцээн уралдаанд нь өндөр амжилт хүсье.

Тэмцээний дүнг https://scholarscup.org/results/ хаягаас орж үзнэ үү.