ГАДААД ХАРИЛЦААНЫ САЙД Б.БАТЦЭЦЭГ “ХЕЛЬСИНКИ+50” ОЛОН УЛСЫН БАГА ХУРАЛД ОРОЛЦОЖ БАЙНА

Монгол Улсын Их Хурал, Засгийн газрын гишүүн, Гадаад харилцааны сайд Б.Батцэцэг Бүгд Найрамдах Финланд Улсын Гадаад хэргийн сайд Элина Валтоненийн урилгаар 2025 оны 07 дугаар сарын 30-31-ний өдрүүдэд Хельсинки хотноо зохион байгуулагдаж буй “Хельсинки+50: Өв уламжлалаа хүндэтгэн, ирээдүйг цогцлоох нь” сэдэвт олон улсын бага хуралд оролцож байна. 

Энэхүү дээд түвшний уулзалт нь Европын аюулгүй байдал, хамтын ажиллагааны байгууллага (ЕАБХАБ)-ын үндэс суурь болсон “Хельсинкийн төгсгөлийн баримт бичиг”-ийн 50 жилийн ойд зориулан зохион байгуулагдаж байгаа бөгөөд оролцогч талууд өнгөрсөн 50 жилийн хугацаанд бүс нутгийн аюулгүй байдал, хамтын ажиллагааны чиглэлээр гарсан ололт амжилтыг дүгнэж, ирэх 50 жилийн хөгжлийн чиг хандлага, сорилт, боломж, цаашдын бодлого, арга хэмжээний талаар хэлэлцэж байна. 

Монгол Улс Софи хотноо 2004 онд 12 дугаар сард болсон Сайд нарын Зөвлөлийн 12 дугаар уулзалтын үеэр ЕАБХАБ-ын Азийн тав дахь түнш улс болж, улмаар 2012 оны 11 дүгээр сард тус байгууллагын 57 дахь гишүүн улс болсон. ЕАБХАБ нь өдгөө Европ, Төв Ази, Хойд Америкийн 57 улсыг нэгтгэсэн бүс нутгийн аюулгүй байдлын асуудлаарх хамгийн том байгууллага юм. 

Гадаад харилцааны сайд Б.Батцэцэг бага хурлын хүрээнд болсон “Европын аюулгүй байдлын суурь зарчмын нэр хүндийг хэрхэн бэхжүүлэх вэ?” сэдэвт хэлэлцүүлэгт илтгэгчээр оролцож, бүс нутгийн энх тайван, аюулгүй байдлыг хангахад чиглэсэн Монгол Улсын гадаад бодлогын зорилт, санаачилга, тэр дундаа ЕАБХАБ-ын хэмжигдэхүүнүүдийн хүрээнд хамтын ажиллагааг гүнзгийрүүлэхэд оруулж буй хувь нэмрийн талаар мэдээлэл хийв. Тэрээр мөн бага хуралд оролцох үеэрээ ЕАБХАБ-ын Ерөнхий нарийн бичгийн дарга ноён Феридун Синирлиоглутай уулзаж, ярилцав.  

Сайд Б.Батцэцэг Монгол Улс ЕАБХАБ-ын үндсэн зарчим, үйл ажиллагааг дэмжиж байгаагаа нотолж, энэхүү ойн арга хэмжээ нь ЕАБХАБ-ын цаашдын үйл ажиллагааг орчин үеийн шинэ сорилтуудтай нийцүүлэн хөгжүүлэх, байгууллагын нэр хүндийг бэхжүүлэхэд үр дүнгээ өгнө гэдэгт итгэлтэй буйгаа илэрхийлэв.  

Мөн манай улс ЕАБХАБ-д гишүүнээр элссэн нь Монгол Улсын аюулгүй байдал, гадаад бодлогын үзэл баримтлалтай нийцэж байгааг тэмдэглээд, ардчилсан үзэлт гуравдагч хөрш орнуудтай бүс нутгийн аюулгүй байдлын хүрээнд хамтран ажиллах, улс төрийн итгэлцлийг бэхжүүлэхэд чухал болохыг тэмдэглэв.  

Ерөнхий нарийн бичгийн дарга Ф.Синирлиоглу Монгол Улс ЕАБХАБ-ын үйл ажиллагаанд идэвхтэй оролцож ирснийг өндрөөр үнэлж, Монгол Улс нийгэм дэх эмэгтэйчүүдийн оролцоо, терроризмтой тэмцэх чиглэлээр бүс нутгийн аюулгүй байдлын хамтын ажиллагаанд хувь нэмэр оруулж байгааг онцлов.